2017-03-01 【蘋果日報】請埋緋聞女友江欣燕做嘉賓 李健達:等佢度下期先

瀏覽次數:914

80年代唱《也許不易》嘅唱作歌手李健達,將於5月出山舉行處男騷,喺旺角麥花臣場館開「十二門徒演唱會」,李健達接受《蘋果》電話訪問表示:「5月5日開演唱會,第一個個人演唱會,好耐冇做大型舞台,自己離開娛樂圈一段時間,又緊張又興奮,信心唔敢講,點都要撐!」

年過半百嘅李健達,笑言自己係上一個年代歌手:「已經50幾歲,唔係O靚仔,其實咁耐冇出幕前,音樂變得好犀利,自己始終做創作,希望鼓勵新一代,睇到O依家樂壇有啲心噏,啲人話香港音樂死晒,當年好輝煌,o依家唔係話啲人做音樂唔用心,但要加多啲力,要有態度,我覺得最緊要做多啲。」
問到演唱會有冇請嘉賓?李健達話:「一直都請緊,除咗有袁鳳瑛,仲有錢嘉樂同吳鎮宇,佢哋都跟我學過唱歌,最開心有新一代歌手包括可嵐同李卓庭自動獻身;仲有死黨鄭敬基、張錦程,自己都好想請朱茵,97年幫佢做過監製教唱歌,會邀請朱茵嚟睇騷。至於緋聞女友江欣燕都請咗,等佢度下期先,友情係錢都買唔到。」為了操弗開騷,已由203磅減至165磅,李健達笑言經理人要佢再減:「日日操,一把年紀都想好睇啲,希望再弗啲。」