2018-06-02 【東方新地】五歲大女夠獨立 錢嘉樂 湯盈盈 貼身湊細女

瀏覽次數:51

下個月就滿43歲的湯盈盈,一直想趕在45歲前為老公錢嘉樂追個慈姑,不過,本身要忙拍處境劇《愛・回家》,又要湊住兩個囡囡,已經忙到冇時停,追仔大計只好一拖再拖;幸好,剛滿5歲的大女凱晴Alyssa非常乖巧,除了是校內優異生,性格又夠獨立,唔使爸爸媽媽操心,令嘉樂盈盈可以放更多時間貼身湊細女,兼做足準備追多個。

日前,嘉樂一家四口,連同嘉樂父母三代同堂溫馨出巡,陪兩個囡囡去公園遊樂,只見嘉樂同盈盈全程緊張湊住兩歲細女凱琪,相比黐身的妹妹,五歲大女凱晴就相當獨立,見爸爸媽媽掛住擒入草叢同妹妹影相,更加會走開自己玩,唔會扭計同妹妹爭寵!

嘉樂 有女萬事足

52歲錢嘉樂同42歲湯盈盈結婚六年,先後誕下兩個得意囡囡,大女凱晴已經五歲,細女凱琪亦兩歲半,雖然16年復出拍處境劇《愛・回家》過戲癮,但盈盈仍將家庭放首位,乜都湊女行先。據知情者透露:「一路都有監製搵盈盈拍劇,但為咗照顧兩個囡囡,佢全部都推晒,前年復出拍《愛・回家》,盈盈都係想過吓戲癮,話晒拍處境劇時間穩定啲,佢可以多啲時間留喺屋企湊女,其實教兩個女功課,又要照顧佢哋飲食好辛苦,盈盈好珍惜同囡囡嘅親子時間,會同囡囡一齊整嘢食同做勞作,佢覺得小朋友嘅成長過程好重要,做媽咪一定要陪佢哋逐一體會,就算嘉樂工作再忙,盈盈都一定要老公盡量抽時間湊女,唔可以疏忽兩個女嘅成長。」

兩個女都係公主控,嘉樂盈盈在2018第一天,就陪兩個女兒入主題公園玩迎新年,嘉樂盈盈更戴上米妮及蝴蝶頭箍氹女,大女凱晴似足爹哋,細女凱琪就似媽咪。

因為兩個女最愛去主題公園玩,錢嘉樂湯盈盈陪女兒入住新酒店,難得嘉樂趕完電影埋尾,可以陪老婆湊女,盈盈開心喺IG留言:「很開心爸爸都有時間來!」

做公主慶生

今年三月大女凱晴五歲生日,盈盈專登安排在主題公園搞生日會,請齊好友幫囡囡慶生,更幫囡囡換上公主裙,一圓女兒的公主夢。

湯盈盈大女五歲生日 大搞公主派對

好姊妹周家蔚及大仔細仔、鍾麗淇與大囡細囡等好友也有出席,非常熱鬧。佢哋仲去咗「皇室庭園」,幫一班子女cosplay,化身成迪士尼公主同王子!

湯盈盈:非常愛你!
Alyssa扮睡公主,妹妹錢凱琪(Kassidy)則扮灰姑娘,周家蔚囝囝亦穿上王子衫。湯盈盈在社交平台上載照片,留言:「5歲生日快樂公主Alyssa ,5歲了,非常愛你!」

嘉樂與湯盈盈婚後育有兩位千金,早前TVB在面書專頁恭喜湯盈盈佗第3胎,不過她已否認,稱是一場誤會。

鍾意嗲爸爸

嘉樂曾公開大讚老婆湯盈盈夠體貼細心,自己亦在老婆影響下,更懂珍惜關心家人。嘉樂讚盈盈不單緊張兩個女,又好關心他的爸爸媽媽,令他學識要珍惜家人!嘉樂話:「佢連菲傭姐姐都話要同對方多啲溝通,了解佢心態,我以為出糧就得,但佢就好在意人哋感受!」的而且確,湯盈盈成功令以往貪玩大唔透的嘉樂修心養性,自從兩個女兒出世後,嘉樂更加有女萬事足,不用工作就享受家庭生活。據好友透露:「自從兩個女出世之後,嘉樂變咗住家男,一收工就話要趕返屋企湊女,假期就一定family day,見親朋友又講湊女經,依家細女先得兩歲半,好鍾意嗲爸爸,嘉樂一見個女就已經冧爆。每次佢出埠做嘢,兩個女都要同佢FaceTime,嘉樂又點會唔冧吖!」

嘉樂一家四口帶埋父母三代同堂家庭樂,陪兩個寶貝女去寓所附近的賽西湖公園玩,期間路過 叢,嘉樂更開心抱住細女凱琪入草叢影相,盈盈就即刻攞相機充當攝影師,幫兩父女攞個靚角度影低開心時刻,反而五歲大女凱晴好獨立,企開睇全程冇扭計。

大女凱晴不但唔會同妹妹爭寵扭計要影埋一份,見爹哋媽咪掛住同細妹影相,自己行開玩,更愈走愈遠。

大女攞學業獎

出世至今,大女凱晴樣子同嘉樂成個餅印,原來連性格亦似足爸爸咁豪邁開朗,平日好少扭計,自從妹妹出世之後,凱晴亦愈來愈獨立。知情者謂:「盈盈要湊住兩個女其實都幾辛苦,好彩大女好乖好生性,好少會同妹妹爭寵,有時見爸爸媽媽緊張湊住妹妹,佢都會自己玩,細細個已經好獨立,玩完玩具又會自己收拾,上個學期喺學校攞埋學業獎,可以話係品學兼優,盈盈不知幾開心!」

大女凱晴夠獨立,細女凱琪就嗲爆爸爸,只見嘉樂畀細女騎住膊馬,沿途行返屋企,雖然兩歲半女兒有番咁上下重量,嘉樂唔怕三十幾度高溫熱到流晒汗,慈父上身任騎都咁開心。

推瘦身代言

六月就滿43歲,享受家庭生活又鍾意小朋友的盈盈,亦想盡快追多個,趕緊為錢家生個慈姑椗。據知情者透露:「盈盈好鍾意小朋友,已經有咗兩個囡囡,都想追個仔,成日同好姊妹周家蔚研究生仔秘方,又搵中醫調理,雖然嘉樂冇畀壓力佢,但自覺年紀都唔細,所以都有啲心急,之前有瘦身公司想搵佢減肥做代言人,盈盈都拒絕咗,唔想喺做代言期間唔可以懷孕,等生3胎,唔想再拖。」


玩了個多小時,一家人行返屋企,細女凱琪騎住嘉樂膊馬行,盈盈就拖住大女凱晴跟在後邊,不過,嘉樂行得快,盈盈同大女大落後,同老公及細女有大段距離。

細女凱琪騎住爸爸膊馬,仍不時回頭望住後邊的媽媽,盈盈見囡囡望到實,即跑上前逗她,剩番大女凱晴在後邊,由爺爺嫲嫲睇住。

陪兩女玩韆鞦

日前,終於完成手頭電影工作的嘉樂,亦爭取時間湊女親子樂,嘉樂先同大女凱晴及父母去寓所對面餐廳吃午餐,而當日要出席《愛・回家》宣傳的盈盈,做完活動即火速歸位,再一家四口連同老爺奶奶出動去賽西湖公園,陪兩個囡囡家庭樂,公園內有唔少遊樂設施,兩個囡囡不知玩得幾開心,盈盈樂樂陪著兩女玩韆鞦,話晒細女只得兩歲半,兩公婆特別緊張睇到實,怕佢唔小心跌倒,反而大女就好獨立自己玩,玩了一輪,見長髮披肩的大女流晒汗,盈盈又細心幫囡囡紮辮,玩了個多小時非常盡興,一家人又慢慢散步行返屋企。當嘉樂路過草叢,又開心抱住細女擒入草叢影相,盈盈即緊張負責揸機影父女合照,見爸爸媽媽掛住同妹妹影相,個性獨立的大女又自己行開玩,只見嘉樂完全被兩歲細女溶化,之後更畀細女騎埋膊馬,沿途行返屋企,慈父上身冧到爆!


嘉樂湯盈盈陪兩個囡囡玩韆鞦,大女主動負責推妹妹嘅韆鞦,非常愛錫細妹。

怕兩歲細女玩韆鞦容易跌親,兩公婆前後圍住細女玩,五歲大女完全唔會呷醋扭計,相當獨立。

不過玩玩吓,大女突然走開去第二邊玩,盈盈發現後亦緊張遠距離睇住大女一舉一動,未有掉以輕心!

當日出發去公園玩前,因老婆湯盈盈有工作,錢嘉樂中午先同大女及父母去寓所對面的餐廳吃午餐,當時細女未見同行。

約瑩瑩母子睇Peppa Pig

早前姚瑩瑩帶住6歲囝囝Evan同湯盈盈三母女一齊去欣賞人氣卡通《Peppa Pig Live! Peppa Pig’s Celebration》舞台劇嘅亞洲巡演香港站,怕醜仔Evan影相時都好緊張,相反媽咪姚瑩瑩好享受同囝囝親子樂,全程笑到四萬咁口,睇嚟仲興奮過囝囝咁喎!


湯盈盈仲一湊二,帶埋佢同錢嘉樂兩個囡囡,五歲嘅錢凱晴(Alyssa)同兩歲嘅錢凱琪(Kassidy)一齊到場。

TVB爆再懷孕 湯盈盈否認陀第三胎

上星期,TVB的Facebook臉書專頁上載了盈盈同4歲大女Alyssa去做親子手作嘅短片,標題寫上【恭喜 湯盈盈 再度懷孕!】,內文又打咗句「恭喜盈盈又有喜啊!」,不過之後這標題好快被刪掉,但就保留咗「大家姐嘅囡囡Alyssa(錢凱晴)同Kassidy(錢凱琪)應該都好期待有其他兄弟姊妹喇」,個個都以為盈盈有咗,但未夠3個月未能公佈喜訊!但當事人之後澄清唔係有咗,話只係佢哋搞錯咗!

湊女親力親為

現年已42歲的盈盈,平時親力親為照顧兩個女,再陀B體能上絕對應付得到,不過生仔唔係話中就中,所以年中已開始調理好身體與作息時間,希望半年內會懷孕成功,所以好姊妹鍾麗淇生日開Party,盈盈未見出席。而錢嘉樂最近完成在台灣拍攝的古惑仔電影《黃金兄弟》,亦留港休息配合造人大計。

https://www.orientalsunday.hk/%e6%9c%80%e6%96%b0%e5%a8%9b%e8%81%9e/%e4%ba%94%e6%ad%b2%e5%a4%a7%e5%a5%b3%e5%a4%a0%e7%8d%a8%e7%ab%8b-%e9%8c%a2%e5%98%89%e6%a8%82-%e6%b9%af%e7%9b%88%e7%9b%88-%e8%b2%bc%e8%ba%ab%e6%b9%8a%e7%b4%b0%e5%a5%b3/23/

圖6:湯盈盈大女係當日主角,坐在公主櫈上拍照,妹妹則由媽媽抱住!
圖7:湯盈盈大女和一班小賓客合照!
圖8:湯盈盈細女和周家蔚兩個囝囝合照!
圖9:Alyssa揀扮睡公主,佢照鏡時特別開心,看來好滿意自己的造型呢!