2018-06-08 【東方日報】【催淚彈】錢嘉樂飛車累鄭丹瑞斷腳

瀏覽次數:36

仲有一個星期左右就到父親節,唔知大家為爸爸預備好禮物未呢?其實就算冇實體禮物,只要有心,價值都比名牌禮物更高。無綫搵嚟藝人錢嘉樂及鄭丹瑞主演微電影,內容圍繞父子情,仲加插埋友情元素,睇到一眾網民眼濕濕!

片中講錢嘉樂個仔啱啱考到車牌,作為「P牌仔」嘅年輕人一定對揸車充滿無限熱誠,而喺家長角度,一定擔心自己個仔未夠成熟去處理路面情況,所以經常叮囑仔仔揸車要專心。作為「P牌仔」當然抵受唔到練車嘅誘惑,阿仔偷偷地揸咗錢嘉樂架車出去會女友,當佢掛住睇訊息嘅時候,一不留神就撞落前面架貨車度!

雖然人同車都只係輕傷,但錢嘉樂就鬧到個仔狗血淋頭,仲摑咗個仔一巴!阿仔以為老竇咁嬲係因為要使錢去整車,但實情係因為嘉樂以前經常飛車,累到好友鄭丹瑞冇咗隻腳,於是嘉樂一直耿耿於懷。最後鄭丹瑞不但原諒咗嘉樂,仲令嘉樂同個仔和好如初。

唔少網民睇完都話錢嘉樂好有《烈火戰車》飛車嘅感覺,仲話鄭丹瑞喺張麗瑾主唱嘅《留給最愛的說話》段獨白夠晒經典:「嗰個落雨嘅晚上,嗰條濕滑嘅公路,仲有嗰個粗心大意嘅司機,令我哋去唔到間咖啡室。」雖然係老土啲,但係正所謂「橋唔怕舊,最緊要受!」

http://tv.on.cc/hk/index.html?i=OEN180608-14652-CO6-M&d=1528453704 http://hk.on.cc/hk/bkn/cnt/entertainment/20180608/bkn-20180608223011649-0608_00862_001.html

圖1:錢嘉樂孖住鄭丹瑞放催淚彈!
圖2:錢嘉樂教仔仔揸車。
圖3:錢嘉樂嬲到一巴摑落個仔度!
圖4:原來嘉樂當年飛車…
圖5:呢件事令嘉樂一直耿耿於懷。
圖6:不過鄭丹瑞最後原諒咗嘉樂,仲令嘉樂父子和好如初。
圖7:大團圓結局!