2018-11-24 【蘋果日報】【齊人唔容易】兄弟情都要講利是? 伊健紅館騷預告冇嘉賓

瀏覽次數:44

鄭伊健、錢嘉樂、林曉峰同謝天華今日為電影《黃金兄弟》原聲大碟喺屯門舉行簽唱會,為500名fans簽名,吸引大批fans到場支持,人潮迫爆3層商場。

大會安排佢哋同fans玩遊戲,重演戲中嘅經典對白,佢哋仲即場獻唱經典歌《友情歲月》,全場齊齊大合唱,氣氛熱烈。

陳小春今日未有現身,鄭伊健笑謂:「都慣㗎啦。」錢嘉樂指陳小春要去南京Stop Angry(舉行巡迴演唱會)。」身旁嘅鄭伊健即笑指:「但係我哋好angry囉。」

嘉樂謂佢哋係兵分兩路:「祝佢個唱順利、good show,我哋已經send咗短訊俾佢。」上星期佢哋4四兄弟就秘密去咗佛山睇小春個騷,錢嘉樂笑言呢幾年成日都一齊做騷,想睇下陳小春自己一個喺台上面得唔得:「冇喺觀眾角度睇佢好耐,OK呀!」

問到明年鄭伊健嘅紅館個唱,係咪都會邀請返呢班兄弟做嘉賓?鄭伊健就暗指謝天華要放長假,未必齊人:「過年吖嘛,有人要放長假,嗰啲公子囉,不過搵佢做佢有份嘅騷又得㗎喎,哈哈!」錢嘉樂即踢爆謝天華要忙着為女兒搵幼稚園:「你哋睇下,佢o依家諗起就滴晒汗。」謝天華即反擊謂:「咁係人都要放假㗎啦。」

問到請佢哋做紅館嘉賓,要畀幾多錢利是?鄭伊健話冇畀利是,所以個個都冇期、冇時間:「嗰次去睇陳小春都係突發,我仲開咗個group叫『靜雞雞』,睇到佢突然喺台上見到我哋,呆咗5秒,從來未見過佢呢個樣。」

講番佢哋今次隻原聲大碟,錢嘉樂指實體碟越來越少見,大家都習慣下載歌曲:「但係《黃金兄弟》嘅精神其實未完,都想創作唔同嘅嘢同唔同人分享。」鄭伊健覺得出碟係代表佢哋嘅誠意,雖然電影已經完晒,今次出碟係想有頭有尾:「大家都知o依家個市場好窄,要好熱愛嘅電影同投資者先會出碟,有得出碟係個好好嘅機會,我哋都好好珍惜。」

https://hk.entertainment.appledaily.com/enews/realtime/article/20181124/58953355