2022-05-06 【經濟日報】【360秒人生課堂】特技演員慧慧積極面對連串逆境 勤奮工作獲錢嘉樂賞識
瀏覽次數:144

在昨晚(5日)的《350秒人生課堂》中,演講嘉賓是曾為無數女演員擔任過動作替身的「幕後女英雄」周穎箖(慧慧),旁聽嘉賓則為擁有近六十年龍虎武師經驗、慧慧恩師之一的火星哥。

打兩份工為媽媽還債

擔任特技演員長達21年的慧慧,小時候因為家人欠下過百萬巨債、年紀小小便幫忙看檔做小販,也因而練出好身手:「廿幾架車一齊走鬼,為咗唔畀人拉,我試過擒水渠二樓跳入後花槽,又試過跳山坡匿埋。」

未幾小販生意捱不下去,慧慧放棄學業,並在花樣年華之齡「瘋狂打工」,短短5年內幫家人還清債務:「我每日打2份工、瞓3個鐘,嗰5年不停遇到好多挫折,但我同自己講,條路直行有乜咁好玩,彎曲啲我老咗行嘅路可能更順。」

天意弄人,好不容易捱過債務難關的慧慧之後竟再遇重擊:「13歲嘅妹妹突然患腦積水爭啲死,我同媽咪崩潰咗,不停問點解,反而細妹冇問點解,佢永遠做完手術都話:『我冇事呀』,佢令做家姐嘅我更加要努力。」

憑實力贏尊重

由於行業內甚少女性,加上慧慧入行時白紙一張,她坦言曾遭受不少冷眼,但剛強的她偏偏愈戰愈勇,並以實力贏回應有尊重。

她續說:「有一次我要碌一條好窄、好直同好斜嘅樓梯,我要喺樓梯度向前滾、去到中間再打側身碌出花園,嗰度大約廿幾級樓梯。當然我做動作前有諗清楚應該點做同點保護自己。」

慧慧表示:「我記得一嗌action我毫不猶豫咁碌出去,差不多去到尾,突然之間『嘭』一聲,我有少少休克,但意志叫我做埋落去,只要未聽到Cut都要繼續演,呢個係我哋專業,我碌完後現場好多人拍手讚好。」

原來她當時撞到頭兼血流如注,不過她最終還是再三確定鏡頭順利拍好後才安心入院,相當敬業。

恩師錢嘉樂現身

即使打8號風球,仍堅持到公園鍛鍊身手的慧慧坦言堅持背後其實是珍惜:「生老病死冇得揀,但如果我哋揀到自己鍾意嘅工作,就要珍惜。」謙虛慧慧最後逐一感謝多年來遇過的恩師,此時其中一名恩師錢嘉樂突然現身,令慧慧感動至哭成淚人。

原來慧慧當年拍攝電影《旺角黑夜》時因毫不錫身舉動惹來錢嘉樂敬佩及關注:「有幕大逃亡戲有個妓女畀人追嗰時,離地飛起再撻落地嘅,現場冇嘢墊嘅,前後拍咗8次。嗰時嘉樂哥第一次識我,就話好嘢、呢個女仔有熱誠,之後佢嘅戲都一定有我份。」

嘉樂勉勵慧慧

對慧慧讚不絕口的嘉樂,更以自己做《獎門人》經歷勉勵慧慧及觀眾朋友:「我係曾志偉先生畀機會我,嗰時每次拍《獎門人》都係行刑咁、喺千幾人面前講嘢好似受難。但如果你將困難當係磨練,把刀磨利咗之後你又多一樣嘢。」

嘉樂語重心長說:「我識慧慧時,佢係臨演帶隊,睇住佢由咩都唔識再變成專業龍虎武師,佢真係捱得架。我哋香港動作電影咁出色,唔係靠1、2個人,而係靠一班無名英雄。」




 
其他近期報導:
2023-02-22 【餅印父女】錢嘉樂湯盈盈細女愈大愈靚 網民稱兩姊妹各有特色:基因的奇妙
2023-02-22 【餅印父女】錢嘉樂湯盈盈細女愈大愈靚 網民稱兩姊妹各有特色:基因的奇妙
2023-02-21 湯盈盈洩蜜 錢嘉樂鐵漢柔情實錄曝光
2023-02-21 錢嘉樂湯盈盈細女愈大愈靚好嬌俏 網民比較兩姊妹嘆:基因的奇妙
2023-02-20 久未現身家庭照 錢嘉樂冧爆慈父樣望7歲細女
 
 
  木日一比 mokuSnoopy - Snoopy商品代購