2022-08-31 【東方新地】57歲錢嘉樂忽然爆大鑊拍《霹靂火》激嬲黃子華:話我戲份多過佢
瀏覽次數:354

嘉樂在娛樂圈打滾多年,日前他與老婆湯盈盈接受港台節目《一起走過》主持人楊紹鴻、文頌嫻訪問,錢嘉樂和文頌嫻1995年因合作拍攝成龍電影《霹靂火》而認識,自不然提到當年所見所聞,內容竟涉及有份參與的黃子華身上!

嘉樂爆黃子華妒忌戲份多 錢嘉樂和文頌嫻1995年因合作拍攝成龍電影《霹靂火》而認識,自不然提到當年所見所聞,內容竟涉及有份參與的黃子華身上,錢嘉樂表示:「95年同一時間拍緊《烈火戰車》,我就斷腳養傷…嗰段時間成龍大哥問我呢排拍緊乜,叫我過去幫手,於是我就去拍《霹靂火》,去到黃子華見到我,就話『嘉樂,你咁多戲嘅?我真係有casting,都唔夠你咁多戲喎』,哈哈!」

「黃子華就係嬲呢樣嘢」 文頌嫻表示:「黃子華係同靚靚(袁詠儀)嗰條線嘅,佢哋喺車房好多戲,我就同成龍另一個阿妹練踢毽,練到身水身汗,結果拍出嚟冇要到,只係擺咗少少喺幕後花絮,好多鏡頭拍晒係唔要。」錢嘉樂繼續講:「所以黃子華就係嬲呢樣嘢,佢話『嘉樂,你係咩人嚟㗎』……佢哋真係casting先入劇組,唔知點解我又突然入咗去,戲份又多過佢。」

文頌嫻《霹靂火》搶鏡 當年19歲的文頌嫻在《霹靂火》中飾演成龍親妹,因被壞人脅持激發成龍飾演的火哥賽車及功夫潛能,角色甚至比女主角袁詠儀更搶戲。

嘉樂衰格被曾志偉睇中 錢嘉樂早年主力於電影圈做武師,於90年代轉到電視台,成為《獎門人》的獎老,他說:「多謝曾志偉,我以前係唔識講嘢,唔係點講嘢,如果熟人就可以一輪咀。」錢嘉樂指曾志偉睇中他夠衰格:「以前打燈時佢會入嚟化妝間,聽我哋武師講嘢,覺得我講嘢幾衰衰格格,幾好笑,適逢陳小春想轉做歌手,志偉就問我有冇興趣。」

「嗰時轉型都要成年時間」 錢嘉樂謂主持《獎門人》系列係一個踏台階:「記得第一次介紹自己嗰幾句嘢,覺得好似行刑咁!唔知TVB係咪覺得錢嘉樂係可造之材,第二年安排我同肥姐(沈殿霞)喺紅館做回歸大騷,嗰年開始做港姐、台慶等大騷。呢啲機會,曾經覺得理所當然,而家會把握多啲,嗰時轉型都要成年時間。」

湯盈盈心痛錢嘉樂成日傷 問到湯盈盈同錢嘉樂如何邂逅?湯盈盈口窒窒話:「我哋拍《獎門人》旅遊節目時識,唔係玩遊戲嗰啲。」點解睇中錢嘉樂?湯盈盈甜笑:「Love is Love,哈哈!」當年可有擔心錢嘉樂拍戲受傷?湯盈盈答道:「同佢一齊時佢拍緊《獎門人》啦,唔會受傷。有時同佢去武師公會睇佢以前啲片,都會好心痛!」

結婚10周年:兩個夠晒數 錢嘉樂和湯盈盈在2000年合作拍攝劇集《封神榜》,錢嘉樂笑言:「二郎神對住琵琶精,最好睇係戲入面我收(服)佢,戲外佢收我,收到而家成屋女人。」今年是錢嘉樂和湯盈盈結婚10周年,有甚麼想對另一半講?湯盈盈說:「我好開心囉,哈哈!」會追多個仔女?她說:「冇,兩個都夠。」錢嘉樂則笑說:「送咗個屋企畀我。」




 
其他近期報導:
2023-02-22 【餅印父女】錢嘉樂湯盈盈細女愈大愈靚 網民稱兩姊妹各有特色:基因的奇妙
2023-02-22 【餅印父女】錢嘉樂湯盈盈細女愈大愈靚 網民稱兩姊妹各有特色:基因的奇妙
2023-02-21 湯盈盈洩蜜 錢嘉樂鐵漢柔情實錄曝光
2023-02-21 錢嘉樂湯盈盈細女愈大愈靚好嬌俏 網民比較兩姊妹嘆:基因的奇妙
2023-02-20 久未現身家庭照 錢嘉樂冧爆慈父樣望7歲細女
 
 
  木日一比 mokuSnoopy - Snoopy商品代購